匯控老臣子 賀總部25歲

【明報專訊】匯控（0005）中環總部大廈25周年，噚日開始一連4個禮拜嘅展覽，展出舊大廈嘅照片同埋當年開幕盛况。為咗慶祝呢個盛事，噚日匯控喺總部舉行咗揭幕典禮，仲邀請咗匯豐銀行前主席施德論（John Strickland）、過百名自總部落成已喺匯豐工作嘅老員工，同埋當年有份建成大樓嘅承包工程公司，一齊參與揭幕酒會。

施德論話，當年佢有份參與建造新總部，已經退休嘅佢，家同太太長居香港。事實上，佢自1966年加入匯豐以來，已經喺香港長住，仲經常返嚟探舊部。小琴喺會場見到工商業務主管陳樑才，原來佢都係老臣子，早於1977年已加入匯豐，見證住舊總部大樓拆卸，至今仍對舊大樓用馬賽克鑲嵌嘅穹頂壁畫，印象深刻。

雷曼事主同場贈興

不過，匯豐喺大堂舉行嘅展覽，變咗雷曼事主嘅新戰場。噚日樓上舉行開幕禮，佢哋就喺樓下打鑼打鼓贈興。展覽日期到8月20日，小琴希望去參觀嘅市民唔會被騷擾啦。