亞博館謀大眾化

【明報專訊】小琴之前入機場嘅亞洲博覽館，好多時都係去聽吓演唱會咁，以往嗰度舉辦嘅展覽好多時都係只限業內人士參觀，例如珠寶展、電子展咁，都係非一般普羅大眾可以進入。不知不覺亞洲博覽館已經有5年歷史，佢未來打算搞多啲公眾可以參加嘅展覽，好似8月會搞個幪面超人展覽，相信會吸引好多大朋友同小朋友捧場！

其實亞洲博覽館同會展，一直都係競爭對手，聽亞洲國際博覽館行政總裁哈永安講，如果計以業內人士為目標嘅展覽，佢哋市佔率佔三成，今年亦會有30幾個呢類型嘅展覽。佢仲話，家算係有少少錢賺，而且搞呢啲畀公眾參加嘅展覽，可提升知名度，所以未來都會搞多啲呢類型展覽！幪面超人迷8月就可以去朝聖，大會仲請嚟日本本土人馬嚟港演出。鍾意小動物嘅朋友，亞洲博覽館月底亦會有一個親親動物農莊為主題嘅展覽，為5周年誌慶活動揭開序幕。