國泰慳成本 唔敢打雪糕主意

【明報專訊】國泰（0293）業績大翻身，噚日出席發布會嘅高層及公關大員，大家都笑笑口。梗係啦，可以預支14日人工做花紅，呢個暑假可以玩得盡興啦。不過，小琴早排聽做國泰空姐嘅朋友講，話航機上有啲餐飲食品唔同咗，以前派名牌朱古力做甜品，家就用冇咁名牌嘅朱古力代替。

抽起雪糕 「會上頭條」

噚日，小琴問國泰高層餐飲膳食有冇縮皮，特別係乘客最享受嘅雪糕？常務總裁史樂山即刻話，從來冇諗過抽起客機提供嘅雪糕，如果抽起嘅話，佢相信會成為災難（disaster），所有報章會登晒做頭條。佢強調，喺經營艱難時期，都係維持原有服務，唔會削減任何東西。近期佢哋提供更多美食，同酒樓合作提供中式佳餚。