興業炒藍灣戰績一般

【明報專訊】查氏家族旗下嘅香港興業（0480），一直都有投資二手樓。地產界老友向小琴報料，話興業已沽出手上小西灣藍灣半島最後一間二手樓，帳面大幅獲利118萬元，係投資該屋苑帳面賺幅最多嘅一宗成交。小琴搵到興業先前沽出嘅8伙藍灣半島，帳面總共只能微賺81.8萬元，計及成本，還要輕微損手，遠遠不及興業投資其地頭，即愉景灣及東涌二手樓嘅戰績咁標青，可見興業衝出大嶼山嘅戰績一般。

話時話，興業2007及2008年報顯示，購入藍灣半島9個單位。小琴資源有限，只能搵到8伙，未知最後一伙情况如何？代理朋友就話，興業已經沽清藍灣半島持有嘅二手單位。不過，由於興業太早沽貨，所以戰績一般。

投資東涌愉景灣 戰績則不俗

不過，興業投資東涌及愉景灣屋苑二手樓，成績就十分理想，不少於2007年入貨單位，都未曾出售，估計為數有幾十個，有朋友指出呢批單位可能已升值數千萬元或以上。如近一年，興業就透過一間公司再掃入愉景灣逾10伙二手樓，呎價只2000餘至6000餘元。

興業於數年前曾表示，近年難以高價吸納土地，故轉而掃入樓價相對落後嘅二手物業，係「另類增加土地儲備」策略。事實上，興業一直都會於樓市低潮吸納二手樓，如1999年亦入貨唔少。不過，都係以愉景灣為主，一來可以投資，二來可以對島上樓價起平穩作用，一舉兩得。不過，該集團亦會趁樓市高位沽售單位，2007年曾一氣售出愉景灣不少二手樓，套現約1.35億元，賺幅由一成至1倍不等，例如愉景灣海蜂徑一間洋房，於1999年以1100萬元購入，2007年6月以2250萬元售出，賺幅高達1倍。

報料電郵﹕[email protected]