恒生搞音樂會民工子弟

【明報專訊】富士康（2038）員工跳樓事件，引起中央對民工福利嘅極大關注。總理溫家寶更表明，政府以及社會各界都應該像「對待自己的孩子一樣」對待農民工。喺內地做生意，最緊要配合國策，恒生銀行（0011）就深明此道，積極配合政府。恒生銀行（中國）8月8日就喺上海舉行咗「開拓音樂新世界」音樂教育活動，邀請咗160名民工子弟出席，為佢哋帶來歡樂。

恒生話，「開拓音樂新世界」活動，邀請咗香港管弦樂團首席敲擊樂師龍向榮及其團隊，進行一整場互動演出。上海160多名外來民工子弟獲邀出席今次音樂會，包括親人正在世博園區工作，因而留在上海過暑假嘅兒童。恒生中國嘅客戶，亦特別組織外來民工員工嘅子女參加。

香港管弦樂團與孩童共演敲擊樂

音樂會以敲擊樂呢種易於推廣嘅音樂表演形式，演出多首來自世界各地嘅敲擊樂名曲，以及深受兒童喜愛嘅卡通音樂串燒。恒生中國副董事長兼行政總裁薛關燕萍話：「音樂傳遞快樂，更是兒童成長中不可或缺的部分。恒生中國希望通過敲擊樂這種富有激情和力量的音樂表演形式，激發孩子們對音樂的熱誠。」

透過今次活動， 民工子弟們學習咗敲擊樂相關知識，享受到敲擊樂帶來嘅樂趣。藝術家仲教佢哋以身體各個部位為樂器，或以紙張製作樂器，甚至生活中隨處可見嘅水桶、餅乾罐等等，台上台下共同奏出多首「源自生活」嘅樂曲。

報料電郵﹕piano@mingpao.com