王晶余錦基違規 須惡補董事課程

【明報專訊】名導演王晶（真名王日祥）及富豪余錦基，做咗上市公司董事多年，但也老貓燒鬚。噚日港交所發新聞稿，譴責王晶及余錦基等4名漢傳媒（0491）現任及前任董事，命令佢哋4個人都要喺半年之內，修讀一個24小時嘅董事職責及企業管治事宜培訓課程，一於要再培訓。

涉幫漢傳媒炒股逾億損手

原來，漢傳媒喺07年初供股集資咗1.034億元作營運資金，但卻以缺乏投資機會為理由，將筆錢攞去炒股票，身為公司執董及董事總經理嘅王晶，負責資金管理及短期投資策略，佢喺07年8月至11月，分三次喺場內及場外，以1.66億元購入三批和成國際（0651）股份。呢批股票結果損手，07年中期業績虧損7678萬元，大部分來自和成。

未取股東首肯 證監譴責

港交所話，買入呢批股票對漢傳媒係一項重大投資，按規定要主動作出公布、通知及取得股東批准，之但係王、余等董事並沒有咁做，直至港交所見07年中期業績有大量投資虧損後，向漢傳媒查詢，先至喺08年10月披露。王晶直接參與買和成股票，但沒有確保公司作披露，違反董事承諾，而余錦基等人，亦違反董事承諾，要作出譴責，並且要讀培訓課程，成功取得課程證書後，先至可以了事。余錦基已在09年1月辭任，當時佢話，係因為啱啱做咗通波仔手術，醫生要佢多啲休息咁話。