澳博認股權 發畀霍震霆

【明報專訊】已故全國政協副主席霍英東長子霍震霆，啱啱喺周一（30日）晉身賭王何鴻燊領導下嘅澳門賭業大哥澳博（0880）董事局，成為執行董事。澳博噚日立即宣布，向呢位新紮董事發出300萬認股權，市值2244萬元。同樣獲發認股權嘅仲有澳博非執行董事、新世界（0017）主席鄭裕彤（彤叔）。

澳博向霍公子發出嘅認股權，要霍公子接納先至生效。如果接納，呢批認股權嘅有效期，係由2011年2月28日至2020年2月27日。喺呢10年之內，霍公子可以決定是否行使。如果決定行使，霍公子可以用每股7.48元，相當於噚日收市價認購澳博新股，成為澳博嘅股東。

彤叔亦獲發200萬份認股權

至於彤叔，則獲發200萬股認股權，有效期及行使價，與霍公子相同。彤叔原本已有100萬股認購權，行使價好平，低至每股2.8元，今年1月已經可以行使，但彤叔未行使過，用噚日收市價計，呢批市股已帳面賺468萬元。彤叔家揸住澳博嘅阿媽澳娛18％股權，間接持有澳博約11％股權，都算係主要股東之一，故此，喺澳博有個董事位畀佢老人家坐吓。

至於霍公子，佢父親名下嘅澳門霍英東基金會，係澳娛第二大股東，持股27.75％，間接持有澳博16.6％股權。但喺霍老在生時，霍家一直唔係好理會澳娛及旗下賭業，故此，今次霍公子突然加入澳博做執董，即係要直接參與管理一間賭業公司，的確令人感到意外。

報料電郵﹕piano@mingpao.com