富邦張明遠轉做顧問 薪酬減半

【明報專訊】小琴相信好多打工仔都想提早退休歎吓世界，富邦香港（0636）執行副總裁兼執行董事張明遠，可能都係想休息吓，所以已經辭任執行副總裁一職。

曾於摩通紐約總部任職

不過憑佢縱橫金融界咁多年嘅經驗，完全唔做嘢就嘥咗佢，所以佢會轉去做富邦非執董以及顧問，每年顧問費及值勤費合共263萬元，比起2009年佢總薪酬少咗55％。

今年53歲嘅張明遠，喺富邦都大大話話做咗6年，負責監控同風險管理部，2006年委任為執行董事，一直到家。

佢曾於摩根大通紐約總部任職，擔任企業融資及環球信貸風險管理部副總裁，隨後加入中國國際金融有限公司，出任資本市場部主管；亦曾擔任過中銀國際投資銀行部主管及行政總監。