時光倒流四十年叉蛋飯充闊佬

新開餐廳玩懷舊 Feel，帶你重回六、七十年代齊嘆來路餐，懷舊佈置回歸粵語長片年代，講句嘢都差啲唔覺意拉長尾音。好彩食物無話 Old school，叉蛋飯竟然加入矜貴鵝肝，撈飯食好味到 O晒嘴。今日，就等進入懷舊 Mode嘅 Ally妹同 Tan哥帶你擦餐勁啦。
記者：徐務研
攝影：林栢鈞
Model： Ally、 Tan
化妝： Mode
髮型： Xenter
港人愛來路貨

家陣乜都話要創新，今日買新電話聽日就話出新型號，跟潮流？真係破產都唔掂，計我話都係懷舊好，買少見少先最值得回味，新開「來佬餐館」坐落中環貴價地段，四層樓高舖頭唔玩 Grand，竟然玩懷舊，一二三層擺枱凳開餐，最頂樓係廚房，地方好大坐得舒服。
離遠先見到一個懷舊大光燈招牌，入舖好似進入咗叮噹嘅時光機，觸目所見，係六、七十年代最流行嘅花紋牆紙、卡位有木製百葉簾、雲石枱搭灰色梳化、昏黃西洋吊燈、鑽石形雙色調地磚、牆壁掛滿舊香港建築物同街景相片，有啲相片甚至已經褪色，喺暗淡燈光下，真係好有時光倒流四十年 Feel！值得一提嘅係呢間舖周日至四營業至凌晨兩點，周五、六同公眾假期前夕仲勁，開到凌晨四點，喺附近蒲完通頂，仲有地方坐坐。
咪住先，關「來路」乜事呢？原來廣東話「來路」來自英文「 Royal」，即指六、七十年代受香港人歡迎嘅西方事物，當時香港仲係俾英國統治，香港人好鍾意「來路貨」，即係西洋玩意，同時亦開始興起港式西餐，董事 Jackson：「我哋間舖，就係想重塑當年嘅飲食文化。」唔係講笑，當日 Tan影相嗰陣，可能真係受到懷舊氣氛感染，居然 Chok樣變調係咁唱：「當年相戀意中人，大家性情近……」嚇到 Ally立即彈埋一邊。

■鵝肝充闊佬飯$98

■頭頂有一盞盞懷舊吊燈，散發柔和黃光，加添幾分情調。

■用木色做主調色，花紋牆紙絕對係六、七十年代標誌，夠 Old school。

■牆壁掛滿老香港照片，好有歷史價值，八十後真係要嚟見識吓。

■木製百葉簾、梳化卡座，懷舊氛圍滿瀉。

■古老當時興，鑽石形雙色調地磚，我覺得真係好型。
鵝肝蛋汁撈飯食

我係 80後，懷舊還懷舊，食物有無少少新意先？師傅：「請你食叉蛋飯。」嘩，唔係咁多謝呀？有無咁敷衍呀？睇真，原來係鵝肝充闊佬飯，菜名認真搞笑，加矜貴法國鵝肝 Upgrade叉蛋飯，果然夠「闊佬」！配越南葱油，「葱」取諧音「充」，所以叫「充闊佬」！味道方面，鵝肝煎得外層香脆，師傅教路話最好蛋同鵝肝一齊攪爛撈飯食，蛋汁同鵝肝混入熱辣辣飯粒，好味到難以形容，叉燒用最靚脢頭肉部份，入口比較嫩，真係學食神話齋：「叉燒飯都可以好好食！」 Tan又點睇？掛住睇女，掛住充闊佬餵 Ally食飯，不過佢都不忘話：「加咗鵝肝，每啖飯都好滑。」
瑞士雞翼唔係來自瑞士，只不過舊時侍應誤將「 Sweet」讀成「 Swiss」，變成一個美麗的誤會，「來佬餐館」懷舊得嚟都有自己特色，人哋用雞翼佢改用乳鴿，當堂有氣勢好多！師傅選用十二両重石岐鴿，貪其肉嫩骨幼，滷水汁用豉油同大量海味炮製，甜之餘另添一份鮮味，唔似一般瑞士汁一味得個甜字，乳鴿難入味，所以先用秘製醬汁醃一小時，再用滷水汁慢煮半小時至完全入味，鴿肉 Juicy唔嚡口，我 Like呀。
三點三腐乳撈砂糖
炒飯食得多，黑松露安格斯牛柳粒炒飯你又食過未？聽個名都知矜貴，安格斯牛肉嫩滑軟熟，加入黑松露特別香， Tan哥直頭食到照鏡。威靈頓 66鐵板套餐呢個招牌菜一樣有古講，「沿用傳統威靈頓扒做法，咁啱『來佬餐館』地址喺威靈頓街 66號，所以改埋呢個名。」厚身多汁嘅美國安格斯牛柳先搽鵝肝醬，用火腿包上酥皮再焗，焗好鐵板上，淋汁煙霧四起，肉汁四濺香到不得了。
另一招牌菜係咕嚕肉，無加甚麼古靈精怪配料，勝在汁底酸甜度拿揑得非常好，做到糖膠一樣剛剛黐住肉面，唔會成碟水汪汪，全賴師傅功夫好。
仲有仲有，仲有抵食中式點心套餐明益 OL，包三款自選點心及一客夠薑炒飯，點心我強烈推介菠菜餃，全隻青 BB絕無落色素，用大量菠菜榨汁做餃皮，難怪菠菜味勁濃郁；夠薑炒飯即係薑炒飯，薑飯本身有驅風功效，師傅再改良少少，除薑同蝦米外，再加入潮州欖菜同菜脯，熱辣辣夠飽肚。
三點三又有乜好介紹？首選來佬厚多士，即係腐乳砂糖，初頭以為係甚麼新派小食，原來錯晒，話說以前生活無咁富庶，無牛油惟有改用腐乳搽多士，再加砂糖，估唔到又真係幾好食喎。 Ally最 Like甜品，點咗個來佬梳乎厘，捧上枱堂當嚇一大跳，梳乎厘幾乎有佢個頭咁大，唔會過甜兼勁有蛋香。口乾乾想飲杯嘢，有忌廉溝鮮奶，又滑又甜，我諗好多六、七十年代嘅朋友會懷念呢種味道。

■來佬汁乳鴿$98

■來佬梳乎厘$78

■威靈頓 66鐵板套餐$188

■忌廉溝鮮奶$32

■蜜汁菠蘿咕嚕肉$78

■黑松露安格斯牛柳粒炒飯$82

■來佬厚多士$15

■中式點心套餐$78
來佬餐館（ 3125 3000）
地址：中環威靈頓街 66號