大陸通行正：恩平直送食材　燉椰子日賣200盅

身邊朋友返大陸玩，最擔心係食，又難怪嘅，強國人創意無限，連雞蛋同豉油都可以造假，唔擔心就奇咯。良心食肆買少見少，好彩仲有呢一間，日賣200盅嘅野生天麻老鴿紅棗燉原隻椰子，鮮甜潤喉，必撐之選。文、攝：中行線
《吃喝玩直樂》
真係估佢唔到咁旺呀，閒日夜晚接近七點去到「大唐靚湯」，綠色霓虹招牌已經亮起，地舖同二樓已經Full晒，食客多到連門口露天座位都幾乎逼爆，大熱天時無冷氣都肯坐，可想而知呢間食肆幾受歡迎。
老闆叫大唐哥，恩平人，講呢段說話嗰陣，青筋盡現口沫橫飛：「最討厭嗰啲無良心食肆，用地溝油，又多味精，為咗錢唔理人死活，無人性㗎。」唔係講笑，簡直隱隱然有股莫名正氣呀！「點解主打恩平菜？」大唐哥話：「一來係我家鄉啦，二來恩平係珠江三角洲唯一未受污染嘅地方，啲水好清，雞鴨鵝魚可以喺原生態生長，質素特別好。」店舖八成食材，每日由恩平新鮮運到，為保持新鮮，所以每日預貨都唔多，賣晒就無。

野生山坑螺￥35.5賣相黑媽媽，幾醜樣吓，估唔到只用紅綠椒同洋葱一炒，又香又鮮味。

恩平燜鵝￥35.5燜鵝亦係必點之選，醬汁好濃味鵝肉嫩滑，尤其嗰層肥厚鵝皮，更係精華所在。

恩平陳皮焗番薯￥28.5番薯有濃濃陳皮香，香到隔籬枱都聞到，送飯一流。

農家菜心￥24.5食落菜味濃郁，葉嫩無渣，連灼菜嘅湯都好清甜！

仙人球南北杏燉龍骨￥22.5有化痰止咳同清熱功效，夏天飲最啱。

野生山坑魚仔炒酸笋￥33.5老闆話酸笋係恩平一位80歲老人家，專登用山泉水醃嘅，一醃三個月，好入味㗎。
良心菜無添加
裝修方面，零豪裝，方枱圓枱擺到密密麻麻，加多個寫滿是日推介嘅黑板，就係咁多，勝在燈光火猛乾淨企理。好少食肆肯俾人走入廚房，大唐哥例外，「廚房師傅有多年經驗，夠晒水準，仲有，我用嘅食油成￥370一桶，絕對唔係地溝油。」邊講，佢邊向我介紹擺放整齊嘅恩平原食材，最矚目係一袋二袋密封椰子，堆到半個人咁高，「我哋最出名係野生天麻老鴿紅棗燉原隻椰子，每盅要燉四個幾鐘，有驅風、治頭痛、治頭暈、養顏功效，幾乎個個客都飲一盅，閒閒哋日開二百個椰子，每晚十點過後一定賣清光，賣完就無。」我試過，清甜得來好潤喉，飲完唔會口乾，我連湯渣都唔放過，點豉油食埋落肚。

廚師會因應當日食材作是日推介，一目了然。

閒日生意都咁旺，想食好嘢要早到喇。