新聞類別
財經
詳情#
【明報專訊】小琴冇耐前八到，九倉（0004）主席吳光正滑雪跌親，佢噚日出席公司股東大會，但見佢龍精虎猛，小琴個記者朋友問候吳主席一聲，問佢究竟點樣整親。跟住吳光正淡淡然咁話：「喺奧地利滑雪時自己唔小心整親，背脊8條肋骨斷咗啫！」
阿Peter（吳之洋名）仲話，斷肋骨嚟講佢唔係第一次，皆因佢鍾意運動，以前打籃球都試過整斷3條肋骨。
住院打乞嗤 一邊肺縮咗四成
至於之前傳佢住咗好耐醫院，Peter就解釋，佢今次斷咗8條肋骨之餘，最麻煩係受傷後有一日打咗個乞嗤，呢個咁「激烈」嘅動作，整到佢一邊肺縮咗四成，當地嘅醫生話唔可以搭飛機，結果佢就喺當地留院20日，搞返掂個肺先搭飛機返香港。
事發不過係兩個月前嘅事，Peter噚日已經健步如飛。
出席股東大會 健步如飛
睇返年報，Peter今年已經六十有五，佢話暫時唔可以做上身嘅運動，但噚日朝早返工前都有跑步！小琴真係佩服佢咁快可以復原，運動健將係唔同啲。
最搞笑係Peter仲要話，據講啲肋骨斷完再生翻，會比未斷之前更加強壯，講到成單嘢好似係好事一樁咁，睇嚟Peter身體同心靈都好鬼健康。
不過，小琴又諗起，上次打畀堅叔梁志堅，問候吳光正嘅傷勢，堅叔就話吳光正只係跌親隻腳，同Peter口供有好大出入，睇嚟堅叔有作虛假陳述之嫌囉。
email:[email protected]
留言 (0)
