明哥拍愛國片抗國教科

【明報專訊】「你可愛，令我覺得值得去愛，我就會愛你㗎啦﹗」歌手黃耀明近日好高調談政事，佢以「愛的教育」為題拍咗一段片，但大家唔好以為佢口中嘅「愛」係「愛情」，其實係「愛國」至真。原來關注國民教育科嘅明哥，為咗支持國民教育家長關注組，粉墨登場，呼籲市民參與「一人一信全民運動」，要向國教科說「不」咁話。


明哥喺短片入面大談愛國，認為呢樣嘢唔需要教，「好似同人談戀愛，你教唔到我愛你」；若果國家做錯事，國民可以選擇恨或批評。


「似談戀愛 教唔到我愛你」

明哥又話，「愛」應該係無私嘅，唔係狹隘咁指中華民族。佢呼籲市民企出來，唔好以怕政治為由推搪，唔係嘅話，當後果降臨，「佢來到頭上，扼着你頸、籠罩你，無得表達你就知驚﹗」