美食博覽社企擺檔助弱勢

【明報專訊】聽日（周四）至下周一會展有「香港貿發局美食博覽」，Emily一班為食同事已蓄勢待發準備掃貨。今年除咗一蚊鮑魚等美食，仲有4間社企參加，大家不妨去支持一下，食嘢之餘又可以幫幫弱勢社群。


Emily睇過4間社企名單，樂群社會服務處嘅「樂群健康速遞」同仁愛堂嘅「綠家居」，專做健康營養食品同有機食品，雖然奧運剛結束，唔使再捱通宵睇電視，但零食永遠喺打工仔嘅朋友，入番啲乾果、洛神花蜜餞都唔錯！聖雅各福群會嘅「土作坊」仲出品標註健康嘅花生醬、腰果醬等等，啱晒OL。呢幾間社企都着力為區內弱勢社群提供就業機會㗎。


買糉助更生人士

明朗服務嘅「有粽計劃」就請咗唔少更生人士。佢哋靠賣糉起家，係連鎖餐廳指定供應商，Emily試過啲糉，大隻之餘用料足，佢哋近年積極開拓其他市場，好似鮮牛油曲奇同海鹽腰果曲奇呀咁。4間社企將會輪流喺1E公眾館D12及D14攤位。美食博覽入場費25元，3歲以下同65歲以上免費。