侯志強﹕對田少從一而終

【明報專訊】上水鄉委會主席侯志強早前多次表明支持自由黨榮譽主席田北俊出戰立法會新界東，但政壇流傳侯先生最近被中央統戰部人士「照肺」，被對方「要脅」「棄田」改撐民建聯，唔係就難保惠州政協一職，傳聞仲話侯先生已經就範。Emily噚日走去問侯志強，佢一聽到就大笑幾聲﹕「哈哈哈，我幾時有講過（受壓）啊，我都無講過嘢」，又話自己一句到尾——無壓力咁話。


傳統戰部照肺 堅稱無受壓

咁到底侯先生家幫民建聯定自由黨呀？佢就話自己「從一而終」，又話自己喺內地無生意，做政協多年都係想「做多啲好事、幫吓孤兒」，唔使佢做都無辦法。


記得4年前，田北俊同副主席周梁淑怡出選新東同新西，卻因鄉事派臨門一腳改撐民建聯而「飲恨」。


田少﹕絕無失鄉事支持

唔知係咪怕歷史重演，周太噚日多次強調無聽過侯志強「變節」；田北俊亦透過助理極速回覆，強調絕無失去鄉事支持，又話今個禮拜四上水鄉事委員會開會，佢會同侯志強同場，叫Emily當日親身睇吓。民建聯候選人葛珮帆就話件事聞所未聞，覺得好好笑喎。


新東候選人仲有湯家驊、梁國雄、陳克勤、劉慧卿、張超雄、黃成智、葉偉明、龐愛蘭、方國珊、陳志全、范國威、龐一鳴、蔡耀昌、邱榮光、陳國強、何民傑同梁安琪名單。