自由黨出V煞 蕭思江自爆早從梁

【明報專訊】立選候選人簡介近日上網，參選新界東嘅田北俊同周梁淑怡團隊，簡介背景居然印咗大大個V煞頭像，唔通自由黨支持V煞、支持街頭抗爭？周太解釋，簡介海報其實係反對家議會暴力嘅風氣，所以設計師就用V煞做背景，海報仲寫明會向暴力政治「say no」。周太話海報信息清晰，唔擔心V煞背景會喧賓奪主。


劉健儀簡介如問卷

該黨循港島出選嘅劉健儀就更出位，事關佢嘅簡介等同一份問卷，包括問市民係咪不甘「五區公投」浪費公帑、不滿「拉布亂紀」嘅議員同痛心有人濫用司法程序等，如果公眾喺咁多條都答晒「否」，將會1分都冇，該黨就會建議呢位朋友「應該留家靜修，不用投票」。劉健儀解釋，問卷仲有一條係問香港人係咪尊重「獅子山下」嘅精神，相信冇人會反對，如果有人真係得0分，佢會覺得好匪夷所思。


另外，喺2007年參選立會港島補選時自創「飯碗必勝舞」而一舞成名嘅蕭思江，今屆轉戰「體育、演藝、文化及出版界」。佢喺簡介中自爆係忠實「梁粉」，仲自誇有先見之明，喺唐唐仲係大熱門嘅時候已經支持梁振英。蕭思江話本來邊個做特首佢都無所謂，但唐唐參選時，被問到特首選舉門檻時講過，要避免「以舞代話」嘅人都可以參選特首，蕭思江覺得呢句話擺明針對佢，所以支持CY。


蕭思江稱畀唐唐針對

新東其他候選人包括湯家驊、梁國雄、陳克勤、劉慧卿、張超雄、葛珮帆、黃成智、葉偉明、龐愛蘭、方國珊、陳志全、范國威、蔡耀昌、邱榮光、陳國強、何民傑、梁安琪、龐一鳴。體育、演藝、文化及出版界其他候選人有馬逢國同周俊輝。港島候選人仲有葉劉淑儀、單仲偕、曾鈺成、陳家洛、何秀蘭、劉嘉鴻、王國興、勞永樂、鍾樹根、吳文遠、許清安、何家泰同吳榮春。