反國教科森美加入拍片

【明報專訊】繼歌手黃耀明之後，國民教育關注組搵到電台主持人森美幫手，拍「國民的選擇」短片擺上YouTube，宣傳「一人一信」反國教科行動。已經係兩個小朋友爸爸嘅森美話，家長唔應該「硬食」國教科，情形就好似有陌生人敲門入屋，仔女唔覺意開咗門，家長見個陌生人成個賊咁款，梗係唔畀佢入屋啦。森美仲話，作為家長要畀下一代有選擇空間，畀仔女自己去搵喜歡嘅事物。


「大頭奶粉」比喻國教科

森美一向諗頭多，兩分幾鐘短片入面將國教科比喻成好多嘢，好似「大頭奶粉」咁，唔單止仔女食咗頭大，家長擔心就更頭大。佢話若家長都掌握唔到國民教育係點，又點可以搵下一代做試驗品？森美幫關注組呼籲「一人一信」行動，呼籲家長寫電郵畀學校了解國教科推行情况，同時畀學校了解家長嘅諗法。