業績前沽中移 盈進大賺一筆

【明報專訊】噚日隻中移動（0941）個業績令人大失所望，原本創近年新高嘅股價亦都應聲而挫。希望小琴身邊嘅朋友冇因此而損手。之不過咁，嗰間賣鞋嘅盈進集團（1386）就真係醒目，原來間公司早響星期一（13日）就已經透過子公司，將手頭上啲中移動股份賣鬼晒。


據盈進公布，佢哋原本持有成26萬股，家以每股90蚊左右賣咗，套現成2400萬元，亦都好在佢放得早，如果以噚日得番唔夠87蚊嘅價位，至少近百萬，今次賣走中移動股份，預計為公司帶來135萬元左右之變現收益。


睇番家公司截至今年3月嘅年報，全年蝕咗成1160萬元，相對比下，睇嚟盈進嘅投資眼光比佢做生意似乎更加有一手喎。