梁劉柔芬多謝「陳享利」

【明報專訊】經濟動力議員梁劉柔芬（Sophie）唔再競逐連任立法會，當大家忙住選舉時，佢噚日就忙裏偷閒同傳媒聚會，Sophie整咗好大張「工作報告」派畀大家，講吓過去十幾年嚟公職事業同感受，但成份嘢就隻字不提立法會三個字。份小冊子介紹到佢喺志蓮淨苑做咗超過20年義工，喺聯合國兒童基金會時，又促成「零錢布施」呢個計劃幫發展中國家嘅小朋友，又提倡過將深水埗舊工廈改建成亞太時裝中心等。


Sophie唔參選，但都要幫佢紡織及製衣界接班人、同屬經濟動力嘅陳亨利拉票，佢話最近都有幫對方打吓電話拉票。喺Sophie份小冊子上，亦不經意提到陳亨利對業界嘅貢獻，話感謝陳亨利家擔起咗紡織製衣諮詢中心嘅工作，繼續團結業界向前發展，不過小冊子就將陳亨利個名寫錯咗做「陳享利」。陳亨利嘅對手係自由黨鍾國斌。