「單報」寄選民

【明報專訊】立法會港島直選有14張名單咁多，要突圍唔易。民主黨單仲偕近日搞搞新意思，「涉足傳媒」出版《單報》，派畀港島選民。《單報》創刊號唔單止有單仲偕操刀、批評特首梁振英損害香港核心價值嘅社論，仲畀埋參選超級區議會嘅黨友涂謹申「落廣告」為選舉宣傳，似足真嘅報紙一樣。


除咗喺《單報》力銷自己外，單仲偕仲「出賣」佢兩個囝囝，大爆佢哋嘅私隱。單仲偕話自己絕非怪獸家長，仲話教仔之道就係「放手」。唔講唔知，原來佢個大仔只得10歲時，已同只得6歲嘅細佬自己飛去加拿大，遠赴親戚屋企度假，唔知幾多家長會有佢嘅guts？


參選港島嘅仲有葉劉淑儀、曾鈺成、陳家洛、何秀蘭、劉嘉鴻、王國興、劉健儀、勞永樂、鍾樹根、吳文遠、許清安、何家泰同吳榮春。