上環站翻新完工增廁所

【明報專訊】因應西港島線興建，由前年開始翻新嘅上環站，等咗兩年終於完工喇。港鐵噚日帶Emily同一眾傳媒行家參觀，港鐵車務營運主管李聖基話，本月26日將會全面開放上環站翻新咗嘅東面大堂，即係近E出口嘅大堂，較原定時間表早咗3個月。


開放式客務中心 大堂闊落

佢話東面大堂地方原比較窄，令成個大堂畀人好擠迫嘅感覺，港鐵趁住今次翻新，重新規劃車站嘅機房同設備房位置，騰出更多空間嚟擴闊大堂通道，並換上開放式嘅客務中心，令成個大堂睇落更闊落，面積仲比舊設計多20％，令乘客出入更方便。


除此之外，港鐵喺東面大堂增設男女及傷殘人士洗手間，以及喺站內新設兩部升降機，一部位於E3出口，另一部喺東面大堂。佢話未來如果其他站繼續增設洗手間，都會借鑑上環站設計。