雷士閻焱誓言冇被查

【明報專訊】自從創辦人吳長江下台後，雷士照明（2222）嘅風風雨雨就未曾停過，真係好睇過戲。最新進展係吳長江指香港證監會已着手調查，懷疑有人利用佢辭職嘅消息非法操縱公司股價，不過，公司現任董事長閻焱強調自己同公司都無收到有關調查通知，指事件完全屬於造謠。


董事會喺周二（14日）深夜發通告，力數吳長江罪狀，仲堅拒對方回巢。吳長江前日大反擊，話閻焱明知公司喺25日宣布自己辭任消息非法操縱股價，更遭到證監會調查。報道出街後，閻焱噚日高調反駁，指雷士同佢本人都從未收到調查通知；另一方吳長江亦「澄清」話，從未直指是閻焱受查，但強調自己喺5月20及21日，分別應董事會及律師要求簽署已起草嘅辭職書，但董事會直到25日才公布，事件惹來證監起疑，不過睇翻港交所股權紀錄，大股東中，25日前只得吳長江同富達基金增持買入股份。