CY撐麗芸？ CY都唔知

【明報專訊】民建聯同特首梁振英（CY）關係良好，有眼利嘅市民發現，民建聯九龍西候選人蔣麗芸（Ann）嘅英文宣傳單張上，印咗佢、CY同一班少數族裔嘅合照。莫非Ann 已獲CY 「背書」支持？Emily去問Ann嘅選舉經理楊子熙，原來佢哋無得到CY書面同意。


稱合照屬工作相無違規

不過，楊子熙認為咁做無違規，話張相係Ann同CY開會時影，屬「工作相」，又稱由於無講過CY支持Ann，所以毋須向CY申請，「唔係咪咩相都唔放得」？

Emily睇番立法會選舉指引，發現Ann的確跟足第18章有關《擅用他人名義行為》規定，喺相片下方加上標題，說明活動性質。不過，呢份指引都話，為減少誤會，若相片可能導致選民相信候選人得到照片中其他人支持，候選人宜事先取得該人書面同意。


被毓民國教題秒殺

另外，Ann噚日出席選舉論壇時，被人民力量黃毓民兩條「國民教育題」秒殺。毓民第一題問Ann，中國國旗嘅5粒星代表乜？Ann話大星係共產黨、4粒細星係「工農兵商」，實質應該係工人、農民、小資產階級同民族資產階級。第二題有關1958年「三面紅旗」，Ann靜咗3秒都答唔出代表乜，毓民隨即話，「係人民公社、總路線同大躍進……你愛咩國啊，蔣小姐？」


九西候選名單仲有梁美芬、黃碧雲、毛孟靜、黃以謙、譚國僑、黃逸旭同林依麗。