盧偉國選前拆僭建 話係就BB

【明報專訊】有報章揭發工程界候選人盧偉國喺康樂園嘅屋企有僭建，但最近偷偷拆晒，噚日佢搞咗個誓師大會，唔少行家都想盧偉國解釋番僭建問題，盧偉國就話唔係因為要選舉先去拆僭建，而係因為屋企有BB（即係佢個孫），因為當時BB太細，屋企唔適合做工程，所以最近先拆喎。


唔記得幾時起玻璃棚

被歸為「梁粉」嘅盧偉國話佢對僭建問題從來無迴避，已經搵咗專業人士處理、「做好晒」，又話自己開誠佈公。但對於僭建嘅玻璃棚幾時起，盧偉國話「唔記得」，至於幾時拆僭建，佢亦只係話由4月開始逐步拆，唔肯作具體回應。


噚日盧偉國搞嘅誓師大會有成200人撐場，包括多個上屆支持何鍾泰嘅工程師，好似工程師學會前會長梁廣灝、黃澤恩及嚴建平等，其中做佢競選經理嘅嚴建平話，何鍾泰表現OK，但始終年紀有番咁上下，加上佢2008年承諾係最後一擊，現時再參選就似乎有「誠信問題」喇。工程界另外兩個候選人係黎廣德同陸宏廣。