周一嶽話中國人要撐國教

【明報專訊】前食衛局長周一嶽又出嚟見大家喇，但今次無唱歌，而係以香港殘疾人奧委會暨傷殘人士體育協會會長身分，為28名運動員打氣；但Emily同行家見到佢，自然會問吓時事題啦！當周一嶽聽到行家問佢應唔應該9月推國民教育科，佢就話「大家都係中國人，點都需要引入國民教育」。


周一嶽曾點出民運人士李旺陽「自殺」疑點重重，今次佢撐國民教育？佢解釋國民教育係要推，但一定要維護香港嘅價值觀，「我哋要同大陸融合的話，係需要一定時間」，至於課程內容係點樣、係唔係平衡客觀就係另一回事，「我都希望香港嘅細路仔有分辨對錯嘅能力」。


「膠粒」襲港，Emily請佢以醫生角度分析，周一嶽就話相信高永文局長已經交代咗，唔想再評論政府問題，問及接班人做成點，「佢做得幾好呀，畀多些時間佢哋啦！」周一嶽最後同Emily講可能今年退休，做番自己嘢，家享受緊呢段時間，會去晒殘奧全程。