民主黨區諾軒曬日文 全場靜晒

【明報專訊】超級區議會議席候選人噚日先後出席兩個選舉論壇，保釣人士登陸釣魚島當然成為選舉議題，噚日港台嘅論壇要求候選人評論吓，究竟特區政府應否歡迎保釣船返港，其中民主黨涂謹申團隊中嘅區諾軒就做代表回答，佢想騷吓自己識日文，於是用日文講咗5、6秒，要求日本政府就事件道歉云云。Emily唔識日文，唔能夠評論佢講得啱唔啱，但可以肯定，在場候選人同樣唔識聽，搞到頓時冷場，無人回應。


白韻琹喺論壇上同樣咁強，無論討論緊乜嘢議題，白姐姐都可以拉返去呼籲市民支持佢，論壇其中一個環節要候選人講出地圖上嘅地方，從而講吓對焚化爐、起動九龍東等嘅發展項目，但白姐姐將九龍東搞錯，以為係東涌，當主持話佢答錯、畀個機會佢答多次時，白姐姐竟然話答唔答到唔重要，最重要係市民唔好投票畀保皇黨同偽民主派等。佢不停重複呢個論調，無論大家講緊乜，佢都繼續播帶，何俊仁團隊嘅鄺俊宇忍唔住話佢係「萬能key」，根本唔使理大家講乜。其他候選人仲包括劉江華、馮檢基、李慧琼同陳婉嫻。