陳茂波復工 愈叫愈走

【明報專訊】自從爆出劏房醜聞後，發展局長陳茂波（Paul）幾乎無日好過，上任唔夠一個月就請咗一個星期大假避一避風頭，不過似乎仲未洗得甩公眾對佢「大話冚大話」嘅印象。


噚日阿Paul放完假期復工，出席展城館開幕典禮，所有傳媒都聚焦佢點樣回應市民對佢嘅觀感，現場set好咪兜等佢回應。


不過，阿Paul無論喺啱啱入場定係離開展館時，前後3至4次都無回應傳媒提問，就連政務司長林鄭月娥都一樣唔回應。


問新界東北規劃都唔睬

在場傳媒當然唔收貨，大批記者立即追住嚟問阿Paul，但佢愈叫愈走，愈走愈快，就算係想問佢點樣處理新界東北規劃事件爭議，佢都無回應，好快上咗座駕返政府總部。