中秋臨近 茅台價又起飛

【明報專訊】中秋佳節臨近，內地白酒價格又起飛。北京媒體就話，前排賣得麻麻嘅茅台，呢兩日價錢飈升，加咗成200蚊。


中國高端白酒前排一直都賣得唔好，背後主要原因就係中央政府收緊三公消費同埋政府領導未完成換屆。以枱面上最受歡迎嘅53度飛天茅台為例，價錢由2011年最高峰時2100蚊人民幣一支一路跌到1500蚊一支。但隨住中秋、國慶兩大送禮佳節就快來到，茅台價錢又郁起上來，售價重新企穩1800蚊。


申請「國酒」商標 提升品牌

其實茅台最近動作都唔少，前兩日新華網就話佢向國家工商總局申請緊「國酒」商標，目前已經通過初審，就快可以正式冠名國字號。有內地朋友就話，其實大家對於「國酒茅台」嘅講法早已經習慣咗，只不過如果個樽都可以印埋「國酒」兩粒字，茅台嘅級數又可以再升。