劉健儀曬范太合照

【明報專訊】立法會港島直選，民調顯示自由黨主席劉健儀（Miriam）有墮馬危機，但係，原來Miriam一早準備一張王牌，就係全國人大常委范徐麗泰，早前已有傳范太會撐Miriam，Miriam噚日就喺facebook上載一張同范太嘅合照，兩個人仲手疊手影相，十足一對姊妹。


Miriam話，呢張相係范太喺8月頭歐遊返嚟之後影嘅，佢話范太係因為鍾意佢處事夠客觀理性，同埋欣賞佢即使喺功能界別十拿九穩，都肯轉戰直選，認為佢有勇氣，所以支持佢咁話。


其實，港島女性建制候選人唔止一位，點解范太唔支持新民黨主席葉劉淑儀？Miriam話，暫時唔為意范太會支持其他人，亦冇聽范太提過喎。本報噚日試過聯絡葉太，但佢截稿前無回覆。


港島候選名單仲有許清安、單仲偕、勞永樂、劉嘉鴻、鍾樹根、吳榮春、何秀蘭、王國興、陳家洛、何家泰、曾鈺成同吳文遠。