陳振聰：信教後心境平和

【明報專訊】噚日Emily喺養和醫院撞到陳振聰同個女一齊探人，當然第一時間問佢信咗教後感覺如何？陳振聰笑笑口話：「心情各樣都比以前好好多，心境都平和咗，而家每逢禮拜六、禮拜日都會返教堂。」Emily即刻問佢係咪要告解，佢話告解係天主教嘅嘢，佢信嘅係基督教，答完仲同Emily揮手講拜拜。


陳振聰跟嘅教會牧師林以諾，就喺另一個活動上話：「陳振聰有去兩間教會，其中一間係我牧養嘅教會，另一間喺港島區，比較近佢屋企。」林牧師仲話，不時會同陳振聰食飯傾偈，但案件一定唔講，因幫唔到忙；如果情緒方面有壓力，佢就可以疏導一下，「佢嘅情緒好穩定，初初來教會嘅時候確係唔太開心，但家情况好好」。提到陳振聰以往篤信風水命理，同基督教有無衝突呢？林以諾就話：「睇相、睇風水算係一種學問，唔係信仰，無衝突。」林牧師仲話，陳振聰要經過上聖經班、慕道班同問心事等過程，至少要年半先至可以洗禮。