以勒基金認唔夠政治敏感

【明報專訊】Emily同事噚日報道，基督教組織「以勒基金」日前喺《明報》刊登廣告禱文，禱文引述民建聯候選人支持度大跌嘅新聞，被網民質疑佢哋幫民建聯祈禱。以勒基金職員鍾小姐搵番Emily，話基金可能係政治敏感度唔夠，佢哋無心幫任何政黨祈禱，承諾第日祈禱前會留意。


鍾小姐話，佢哋2003年因為SARS疫症，希望透過禱文祝福香港，至今每日喺《明報》刊登廣告禱文。佢話，12個同事每日都會一齊集思廣益，選取令佢哋有「信仰感動」嘅新聞，好似嗰排交通意外較多，就會幫手祈禱。


鍾小姐又話，上月30日用同一段經文，引述民協退選九龍東及新界西都無咁大迴響。佢強調，基金啲錢同政黨無聯繫，亦無立場話支持邊個候選人，唔係賣選舉廣告，認為有咁諗法嘅人係「對號入座」，不過都話下次揀新聞都會謹慎啲。