公民黨荃灣有民主牆

【明報專訊】公民黨余若薇都幾得啲大業主歡心，2008年喺港島出選時，獲得大業主支持，喺人來人往嘅皇后大道中，免費有一個商廈外牆嘅巨型廣告位，唔少中環上班族都一定見過。今年余若薇轉戰新界西，同樣有超級支持者借出廣告位，喺人流極多嘅荃灣大河道紅綠燈位，借出目前空置舖位嘅三面鐵閘位，畀余大狀獨家展示佢哋嘅宣傳。


有人投訴一度撕走

大河道呢個位，可以稱得上係荃灣嘅中心地帶，唔知係咪有市民眼紅，月中去民政事務處投訴，話公民黨未得業主同意，擅自展示競選宣傳品，當局就向公民黨發出警告，話佢哋唔移走選舉海報等物品，就會即日通知食環署處理，仲要罰錢。


當時由於舖位業主唔喺香港，所以公民黨唯有先撕走海報，但業主知道呢件事後，就索性叫公民黨喺鐵閘貼出公告，話畀所有人知，公民黨係得到業主授權，仲要係獨家展示，警告其他人唔好損毁，否則送官究治。於是公民黨就將三面鐵閘裝飾到好似民主牆一樣，貼滿海報同橫額，相信唔少荃灣巿民都見過。至於呢個恩人喺邊個，公民黨就話唔清楚，話一直都係透過地產代理去搞呢件事。


新界西其他候選名單有梁志祥、李永達、陳恒鑌、譚耀宗、麥美娟、麥業成、田北辰、梁耀忠、陳樹英、陳強、陳偉業、李卓人、何君堯、曾健成、陳一華。