民主黨WhatsApp有密碼

【明報專訊】距離9月9號立法會投票日仲有兩星期多啲，但唔少選民都仲未搞得清，究竟「一人二票」係咩回事。民主黨今日就喺報章賣全版廣告（刊A15版），提醒選民今年1人有2票，而呢個廣告相當創新，模仿whatsapp界面，當中仲有唔少心思位，值得大家留意。


好似喺「偽WhatsApp」界面上，右上面嘅電池容量剩番「64%」，而個信息嘅發出時間分別係「03:71」同「20:12」，相信大家都估到當中隱含咩意思。


民建聯搞錯李慧琼變李慧瓊

另外，民建聯最近亦拍片，出動候選人教市民當日如何投票，又提選民記住帶身分證去票站，到時就會收到兩張大選票以及一個紙板，同埋有剔號嘅印章。不過，成條片上，該黨副主席、參選超級區議會嘅「李慧琼」，就擺烏龍變咗「李慧瓊」。參選超級區議會嘅仲有何俊仁、涂謹申、馮檢基、白韻琹、劉江華同陳婉嫻。