麗芸冇簽名撐普選

【明報專訊】香港社區組織協會噚日舉辦九龍西立法會選舉論壇，論壇完咗之後，社協準備咗一份承諾書，要求候選人簽名支持社協提出嘅7項訴求。各個候選人都毫不猶豫咁簽咗，但社協主任何喜華支持嘅民建聯蔣麗芸，就望住份承諾書，諗咗一陣都仲未簽。點解呢？


其他訴求都有簽名

原來7項訴求裏面，除咗有15年免費教育、每年建3.5萬公屋單位等民生訴求之外，仲有一項係要求「2017普選特首，取消功能組別」。原本份承諾書只係要求每個候選人簽一個大名，但蔣麗芸就好醒目，喺每一項訴求旁邊逐項簽名，唯獨唔簽名支持「2017普選特首，取消功能組別」嗰一項，認真別樹一格。


九西候選人仲包括毛孟靜、黃毓民、黃碧雲、梁美芬、譚國僑、黃以謙、黃逸旭、林依麗名單。