長毛爭射12碼宴客

【明報專訊】社區組織協會噚日搞咗場慈善球賽，為一班打算到墨西哥出戰「無家者世界盃」嘅球員籌款，「長毛」梁國雄都有落場，同一班無家者代表隊成員組隊，出戰和富大埔，長毛表現相當落力，可惜無入球。


Emily現場所見，長毛同隊友似乎冇乜默契，開波幾分鐘都無人傳波畀佢，但長毛依然落力搶波，一味追住對方控球球員，對方最後仲犯下天條，有球員走入自己禁區，令長毛一隊有機會射十二碼。長毛即時「搶住射」，隊友亦好識做，全場一遍「毛哥、毛哥」之聲，但最後射門被龍門撲出，主持人即時打圓場，大讚長毛落力，竄擾力強。


政務司長林鄭月娥噚日擔任頒獎嘉賓，佢致辭時話，出席活動係提醒自己唔好忘記貧窮問題，過去幾個月佢同社協一齊做咗好多訪問，亦有同學者研究貧窮問題咁話。


梁國雄參選嘅新東，參選名單仲包括張超雄、田北俊、葉偉明、陳志全、蔡耀昌、黃成智、范國威、劉慧卿、何民傑、湯家驊、陳克勤、葛珮帆、梁安琪、龐愛蘭、方國珊、陳國強、龐一鳴同邱榮光。