美利大廈歷史任務完結

【明報專訊】中環美利大廈係中區政府山嘅伸延，全盛期有唔少政府部門喺呢度，但隨着政府新聞處聽日搬走，美利大廈就完成服務市民嘅歷史任務，大廈將會「活化」，改裝成五星級酒店，至於幾時先可落實酒店計劃？呢樣政府都答唔到，因為又有一單「司法覆核」，搞到酒店項目遙遙無期！

前任特首曾蔭權喺2009年施政報告提出，騰空美利大廈做酒店，近一年，喺美利嘅部門已經相繼搬走，大廈十室九空，只係剩低新聞處，但新聞處嘅大員明日會搬去近海皮嘅海港政府大樓。


本來準備翻新做酒店

政府本來計劃今年攞美利用地出嚟招標，最快2014年翻新為300間房酒店，但如意算盤打唔響，今次唔係政府做事慢，而係有提人司法覆核，令工程項目受阻，但搞覆核嘅唔一定係大狀黨或者民間團體，反而係發展商和黃。


和黃提司法覆核 招標受延

事件係咁嘅，和黃想將中環長江集團中心地庫停車場部分公眾泊車位改建為超市，被城規會反對之後就提出司法覆核。和黃其後敗訴，現在再提上訴，想推翻城規會通過嘅中區分區計劃大綱圖，位處長江中心隔籬嘅美利用地都受影響。呢單上訴個案排期明年1月29至31日進行，港府官員同Emily講，司法覆核嘅內容同美利用地的改規劃無關，但由於呢單官司涉及整個中區規劃，所以美利用地招標時間要順延。美利呢幅地，業界估值約50億元，睇怕都要曬住太陽等吓先。