鍾樹根吊臂車「升呢」

【明報專訊】立法會選舉將至，唔少候選人都出盡法寶拉票，好似民建聯鍾樹根，睇中灣仔天橋人來人往啱做宣傳，但佢就唔喺天橋上派單張，而係租用吊臂車，升到去天橋嘅高度，隔空向行人揮手嗌咪。Emily理解唔到「鍾根」呢個舉動所為何事，做開區議員嘅鍾根就話，此舉寓意佢要「升級」去立法會喎 。


有人質疑灣仔本來就多車，鍾根呢個舉動會否阻街？鍾根就話嗰度可以停車，未來亦計劃喺北角、柴灣等地租用吊臂車「升級」宣傳，只要地點可以停車就得。呢下奇招宣傳效果如何？鍾根話幾好，仲話呢段時間好多人都唔接單張，佢咁樣反而有好多人駐足留意喎。


梁家傑深夜紅van站拉票

喺九龍東參選嘅公民黨梁家傑，上星期五深夜跨區出咗旺角，向搭紅van去九東嘅選民拉票。佢慨嘆現時打工仔有返工無收工，雖然喺小巴站拉票，可以接觸到更多街坊，但傑哥話細心一諗，背後原因令人嘆息。


港島候選名單仲包括單仲偕、許清安、葉劉淑儀、劉健儀、勞永樂、劉嘉鴻、吳榮春、陳家洛、王國興、曾鈺成、吳文遠、何秀蘭、何家泰；九東候選名單就有陶君行、陳鑑林、胡志偉、黃洋達、黃國健、謝偉俊、譚香文、嚴鳳至。