港鐵公關大姐大退休

【明報專訊】唔少跑開交通嘅記者，尤其係資深行家，無人唔識港鐵嘅公關大姐大、現今公司事務總經理梁陳智明（Miranda）。港鐵前身嘅地鐵1975年成立時，佢已經傍住當時嘅地鐵高層，向傳媒講通車、解釋事故、業績等。唔經唔覺，原來Miranda明年1月9日榮休，離開做咗37年嘅港鐵。


Emily噚日到網上搵舊片睇，佢最早期嘅片係1991年地鐵大故障，當時Miranda代表地鐵向公眾解釋。Emily左睇右睇，21年前Miranda個樣同家差唔多，好難信佢已經到咗退休年齡。Emily祝Miranda展開新一頁，而港鐵就話Miranda係港鐵嘅重要資產，公司制定重要決策時，佢都提供寶貴意見和建議。


前主播接棒

至於接佢嘅係港鐵公司事務副總經理王美琪（May）。講起阿May，佢係八九十年代無綫電視明珠台新聞部嘅主播同記者，亦有做過翡翠台主播，之後入咗地鐵轉行做公關。