傅成玉嘆港沙灘垃圾多

【明報專訊】上月颱風韋森特吹襲香港期間，中石化（0386）委託中海集運（2866）運送嘅膠粒吹晒落海，引起社會公憤。事隔個幾月，呢家大國企嘅董事長傅成玉終於開腔，佢話前幾日自己親身去愉景灣視察，點知除咗膠粒，仲見到有唔少垃圾，覺得有違香港「美麗港灣」的聲譽！


其實傅總原本係講緊中石化點處理膠粒事件，佢解釋番嗰啲係包裝食品的各種塑膠袋的原料，集團都唔知如果啲膠粒長期喺海入面，會出現咩變化，所以有搵環保團體、政府和大學，打算長期做研究。點知講講吓，佢就話佢今個月23號去愉景灣視察嗰陣，見到唔少垃圾，並就此同隨行嘅環保團體分享咗一啲睇法。


稱因事件承受好大壓力

雖然香港海灘多垃圾，都唔係咩新鮮事，但傅總少嚟香港，嚟親都係開會，恐怕從來未去過香港嘅郊區。


說來慚愧，香港人成日話人哋隨街亂拋垃圾，其實海灘都充斥唔少垃圾，如果中石化今次研究清理膠粒之餘，仲幫手諗埋點樣減少海灘上其他垃圾，估計唔少香港人都會拍手叫好。


早前捐千萬助環團買設施

講番膠粒事件，傅總噚日都話，膠粒事件令佢承受好大壓力，心情唔好受。佢仲話中海集運到家都未交報告，中石化甚至連貨物跌落海嘅確實地點都唔知道。


不過，中石化唔理責任誰屬，先拎1000萬出嚟資助環保團體買設備，傅總都話，作為貨主，已經盡咗責任啦。


email:piano@mingpao.com