券商淡市九成孖展搶客

【明報專訊】最近個巿靜到連烏蠅飛過都聽到，股民就話可以放吓暑假炒少陣股，不過靠股民炒股搵食嘅證券行就咪話唔慘，日日負責拍烏蠅！喺咁艱難嘅環境之下，小琴以為一眾證券行都會意志消沉，經紀甚至要開始搵吓秘撈。不過事實上又唔係喎，佢哋出招仲勇猛過以前！


噚日時富證券仲做埋網上交易九成孖展，即日平倉仲要免利息同手續費。


不過又唔係任你買，最低要求存入10萬，同埋只限108隻佢哋指定嘅股票，當中大部分都係國指同恒指成分股。


最低要求存入10萬

問佢哋老細呀Ben鄭文彬係咪見個巿咁慘淡，要趁機搶客。佢就話主要係見啲客有需求，於是就迎合佢哋，唔理個巿好定差。咁講法，時富喺呢個時勢，都仲有幾多大戶生意咁喎！


問佢會唔會學啲行家，出動到減價嚟吸引多啲客。佢就話大家客源唔同，定位又唔同，唯有喺產品度畀多啲心機。


講起個巿，阿Ben都忍唔住講多兩句，佢話家嘅巿况真係好慘淡，除非之後成交可以升番，如果唔係，相信啲散戶嘅入巿意欲都好難翻生。