馬會教整餅刻自家嘜頭

【明報專訊】新一季馬季9月8日喺沙田馬場開鑼，今年馬會搞搞新意思，喺緊接開鑼的周日（16號）於沙田馬場廂房自助餐加插「月餅製作坊」環節，馬迷畀490蚊，就可以食自助餐同跟名廚學整月餅，月餅上面仲可以刻埋自己個名。
名廚之一係馬會總廚師長林雲輝，佢喺2003年通過中華廚藝學院「大師級中廚」技能測試，大師話今次教參加者整蓮蓉蛋黃迷你月餅，蓮蓉係用正宗湖南蓮蓉，又香又滑。廚師會逐步教搓皮、包餡等步驟，參加者最後仲可以設計月餅形狀同刻埋自己個名喺餅面，焗好後參加者就可以將月餅食咗落肚。
馬場方面講，有興趣參加者需打電話預訂，而490蚊已經包埋一位自助餐同整月餅嘅材料費，參加者到時食完自助餐就會分批入廚房學整餅，由整餅到月餅焗好，1個鐘頭就搞掂。