蕭若元冇得口若懸河

【明報專訊】蕭若元伙拍人民力量出選立會港島，但報名後繼續喺《新報》連載專欄文章，隨時違反《立法會選舉活動指引》。Emily上禮拜問蕭先生同埋《新報》，蕭先生話唔覺有問題，會繼續照寫，但之後佢個欄就喺報紙「被失蹤」。


或涉額外宣傳 違《選舉指引》

專欄名稱「口若懸河」，喺港聞版刊載，上周二（8月21日）文章題為〈若不謙卑怎會好學〉，論述選民投票心態，又評論同區對手葉劉淑儀，指對手屬於「權威型」人物。Emily上禮拜問蕭先生，知唔知候選人寫專欄有機會違規，佢話，喺報章寫咗10年格仔，一向相安無事，况且講嘅題目主要係論人生談哲學，唔覺有咩問題。


參選後仍刊14篇

Emily上周問《新報》管理層，無人回覆，但其後個專欄就「被失蹤」。《新報》嘅朋友噚日就解釋，畀蕭先生繼續寫專欄係一個「烏龍」，因為佢參選後，負責版面嘅同事都唔為意，但當知道事件之後就即刻叫停。


不過，選舉期開始至上禮拜，蕭先生已刊登咗14篇文章。選管會話，根據《立法會選舉活動指引》（指引）第11.16段，定期撰稿專欄作家，喺公開表明有意參選後，或在選舉期內，唔應該為印刷傳媒撰稿，避免佢作不公平額外宣傳。


蕭定一內地搞3D電影遭質疑

講開蕭若元，佢嘅公子蕭定一嘅公司中國3D數碼娛樂（8078）近日公布，同內地半官方機構社會科學院合作搞3D電影技術，都算巴閉。但選舉期間呢單嘢就畀網民攞出嚟講，被人質疑佢同內地官方機構做生意賺錢咁話。