人力獲義助抗民主黨？

【明報專訊】人民力量陳志全（慢必）及袁彌明、梁安琪同埋經濟動力嘅邱榮光有咩關係？有人踢爆佢哋喺電視台選舉論壇「打同通」，當人力被民主黨攻擊，梁安琪同埋邱榮光都肯仗義幫手，肯藉故向慢必提問，讓出自己嘅發問時間畀慢必解畫，難怪其他候選人眼紅。


有人見梁安琪慢必擁抱

論壇中候選人互相合作或夾計，並無違規。故事發生喺周日TVB選舉論壇錄影節目，當時民主黨蔡耀昌手持人民幣紙板，指控人力係「人民幣力量」，收咗親建制人士錢，喺紅隧口廣告位賣廣告。中場休息時，有人目睹梁安琪同慢必喺廁所門口熱情擁抱一下，梁開口問慢必，使唔使借啲時間畀佢解釋，慢必就好開心咁話好。


慢必其後將消息通知拍檔袁彌明，袁小姐就話，不如等佢同邱先生傾吓先。休息過後，邱榮光「主場時間」果然挑選慢必發問，而慢必就有備而來咁解釋捐款來源。


邱榮光：想八卦人力財源

邱榮光事後同Emily講，之前唔識人力成員，但見到民主黨指控人力，佢都想八卦吓人力嘅財政來源，所以有時間剩就問吓慢必。袁彌明就承認，確有同邱榮光喺休息時段閒談過，但唔算係「串通」，話大家喺選舉論壇成日都係安排企喺隔籬，所以多咗機會閒談交流。講開「人民幣力量」呢件事，袁彌明話噚日已經去咗廉政公署投訴，指控蔡耀昌作選舉失實聲明。


新東候選人仲有張超雄、田北俊、葉偉明、黃成智、范國威、劉慧卿、何民傑、湯家驊、陳克勤、葛佩帆、龐愛蘭、方國珊、陳國強、龐一鳴及梁國雄。