連日女仔埋身 莫乃光怕怕

【明報專訊】立法會資訊科技界候選人莫乃光（圖）近日畀妙齡少女埋身！話說Charles呢兩日都有公開活動，但兩次都撞到妙齡女子「借頭借勢」問路，噚日仲突然畀人伸手插入腰間，嚇到阿Charles「走夾唔唞」。佢話擔心有人想喺選舉期間屈佢非禮，日後都唔再敢單獨出入，話會搵啲兄弟傍住喎！


驚畀人屈非禮

Charles話，前晚8點經過九龍塘生產力促進局門口，一個身穿粉紅色衫嘅妙齡女子似喺度等人，但佢一出門口就似要暈咁向Charles度撲去，口叫「先生」，路上咁多人就淨係追住佢，搞到Charles要急步去又一城搭的士走！

點知噚日下晝，Charles喺數碼港行去IT街商場，啱啱放慢腳步，就覺得有人急步追嚟，更突然用手摸佢左腰，回頭又見妙齡女子，問佢「呢度有無餐廳」，Charles即刻轉身跑回數碼港。


佢話睇唔清楚兩個女子係咪同一個人，但肯定唔識對方，否則對方會叫佢個名。對手譚偉豪唔知又有冇咁好「艷福」呢？