「牛池灣中女」唱舊老闆葉太

【明報專訊】立法會選舉前夕，近10段名為「中女有野爆」嘅聲帶喺YouTube流傳，內容主要係一個名為「牛池灣中女（安祖娜）」嘅人，炮轟新民黨主席葉劉淑儀嘅種種「不是」，呢個中女表明身分，佢之前係打新民黨工，但已離職，7至8月分別錄製聲帶喺網上唱葉太。


葉太話奇怪 「幫佢寫過推薦信」

「安祖娜」嘅不滿包括話葉太管理不善、對同事唔好同刻薄等，部分指控都幾嚴重，總之佢口中嘅葉太可謂十惡不赦。另一把男聲，估計係曾為新民黨喺南區做地區工作嘅Cyrus，呢位仁兄不滿葉太當日唔畀佢參選區議會，而要讓位畀啲10A狀元，兩人都已經離開咗新民黨。


葉太噚日透過助理回應，話呢兩個前同事當日都係自動辭職，佢仲為其中一人寫咗一封好好嘅推薦信，及後佢曾經向葉太表示搵到份好工，因此對佢近日喺網上嘅評論，葉太覺得有啲奇怪。葉太話早有心理準備喺選舉期間有人會被政黨利用，攻擊抹黑佢，但佢唔會介懷，並專心選舉工程。


葉太參選港島，其他候選名單仲有許清安、單仲偕、勞永樂、鍾樹根、吳榮春、何秀蘭、劉嘉鴻、王國興、陳家洛、何家泰、曾鈺成、劉健儀、吳文遠名單。