迪士尼萬聖節推捉鬼App

【明報專訊】迪士尼樂園萬聖節活動「黑色世界」將喺10月開始，今年以「吸血殭屍大戰狼人」為主題，仲推出手機App畀玩家由園外玩到園內，到全港追蹤「黑色印記」，期望可吸納年輕遊戲玩家入場。不過，今年夜間門票比舊年貴，價格為259元，加價幅度13.5%。


每年萬聖節，香港兩個主題公園都鬥到難分難解，「迪士尼黑色世界」將由10月4日到10月31日，逢周四至周日開放。今年會大玩高科技，將去年受歡迎嘅「擴張現實」技術，融入手機程式遊戲軟件「黑色聯盟戰」。玩家下載後，先選擇加盟「狼人族」或「殭屍黨」，然後到與迪士尼合作嘅商戶、港鐵站、報章雜誌及樂園入面掃描印記，手機屏幕就會顯示「鬼影」，另亦可隨軟件指示到全城各處「捉鬼」。迪士尼發言人話，相對要遊客排長龍玩鬼屋，樂園比較着重整體佈置及氣氛，啱本地年輕人愛玩手機遊戲嘅心態。