蕭若元評六四被翻舊帳

【明報專訊】選舉期近，伙拍人民力量出選港島區直選嘅蕭若元被翻舊帳，將佢以前喺網台評論六四事件嘅37秒聲帶放上網，其中一句最惹火，佢話「出機關槍去掃啲人，係死人少，死得最少嘅方法」。蕭若元話當時已講明反對不人道嘅做法，「機關槍」言論只係「scenario analysis」（時局分析）論政咁話。


講明反不人道 稱時局分析

蕭若元當時喺網台節目大談六四，聲帶中，佢話六四鎮壓好不幸，但指呢個係「死人最少嘅方法」。佢又話，坐喺權位嘅人，要保持穩定，所以出機關槍去掃學生市民，接住又話「你試吓用水炮用橡膠子彈去打，你睇韓國係點樣？街頭打完打散咗，街尾又集中過，100萬個市民，你咪要打幾個月，根本無咁㗎，啲人唔會驚你！」


蕭若元同Emily講，呢啲已經係五六年前喺網台嘅言論，佢話唔怕被人攞嚟做選舉攻擊工具，又話當時只係評論政局，做時局分析，叫Emily聽清楚段聲帶，話佢自己講咗反對鎮壓。


Emily搵到原來嘅節目聽，當時蕭生喺電台同嘉賓講國際政治，講到六四時，蕭若元開頭都有話開槍鎮壓一事有違反人道精神，其後佢先至發表機關槍偉論，話從領導人角度，用機關搶先有驚懾作用，「你話用橡膠子彈，用水炮，要搞幾個月，啲人互相踐踏，會死幾多人？」港島其他候選名單﹕單仲偕、許清安、葉劉淑儀、劉健儀、勞永樂、鍾樹根、吳榮春、陳家洛、王國興、曾鈺成、吳文遠、何秀蘭、何家泰。