劉國勳「食包」 何民傑「食煙」

【明報專訊】噚晚有線電視舉辦新界東選舉論壇，唔少候選人開始打告急牌，10個有8個都話自己好急好急，「告急牌」放到周圍都係。民調支持度高企嘅民建聯陳克勤，喺其他論壇上曾以「誠實豆沙包」諷刺民主黨黃成智講大話，噚日佢團隊嘅劉國勳喺總結時咬咗啖誠實豆沙包後，一臉認真咁為陳克勤告急，以示自己係講真話，選民信唔信好呢？


周圍都係「告急牌」

至於反對加煙稅嘅何民傑，噚晚更加挑戰法例，只要佢一發言，後面團隊嘅人就係咁食煙，成班人吞雲吐霧，表達反對禁煙條例同加煙稅。不過，論壇喺將軍澳一個公園舉行，似乎都係禁煙區，唔知控煙辦會唔會向佢哋發出告票呢？


噚日論壇上，基本上各大政黨都告急，公民黨湯家驊、自由黨田北俊、民主黨黃成智、工聯會葉偉明、民建聯葛珮帆等開口埋口叫告急，唔知選民信邊個好。


新東其他候選人仲有劉慧卿、蔡耀昌、陳志全、梁國雄、范國威、龐愛蘭、梁安琪、龐一鳴、方國珊、陳國強、邱榮光、張超雄。