超級星期日最後衝刺

【明報專訊】9月9日立法會選舉進入最後倒數階段喇，各候選人都趁住選前嘅「超級星期日」總動員拉票，但喺街頭派傳單、嗌咪呢啲方法太普通，候選人想出位都要諗吓計仔，噚日就有唔少人扮鬼扮馬，有人扒龍舟踩單車，甚至全家出動叫埋靚女靚仔幫手。仲有6日咋，Emily都提提大家記得投票呀。


社民連造勢 又見百搭富

社民連噚晚喺金鐘添馬公園搞造勢大會，台上台下一片「紅海」。除咗被揶揄為「泛民拉票萬能key」嘅鄭家富（前右）之外，多名社運人士好似林輝、葉寶琳及音樂創作人周博賢等都有撐場，呼籲選民踢走特首梁振英同保皇黨，更加要防範不停抽社運水嘅「偽激進派」，好明顯係諷刺緊人民力量。


長毛鬧大狀黨佈陣暴力

社民連主席「長毛」梁國雄上台發言時，都有鬧同屬泛民嘅公民黨，話大狀黨今鋪喺港島同新西派出兩人名單，要陳淑莊同余若薇分別力谷兩名男將入局，係好暴力嘅佈陣手法。公民黨家不斷宣稱港島要8萬票、新西要9萬票，即係攞17萬票先可以全取4席，已經攬咗唔少泛民票。


長毛認為，公民黨對抗共產黨只係以被動手法，「最多唔畀對手過半場」，但社民連係會反守為攻、主動出擊，建議選民支持每區只係想攞一席、只需3萬幾票嘅社民連好過。圖前排左為陶君行。