龐愛蘭扒龍舟拉票 曬到燶

【明報專訊】拉票活動都要度新方法，參選新界東嘅龐愛蘭（Scarlett）就因應地區地理環境優勢，訂定拉票方法，噚日一早開始，先喺沙田城門河擊鼓扒龍舟，一直扒到去烏溪沙，然後就踩單車環區宣傳。


Scarlett話噚日熱到爆，烈日下扒船踩車玩足5個幾鐘，雖然搽足防曬液，但一向貪靚嘅佢難免曬到一嚿炭咁！不過，Scarlett話扒龍舟沿河叫咪宣傳，方法好創新，吸引到好多人注意，比一般企定定派傳單好，所以辛苦啲流吓汗都好值得。


（龐愛蘭提供）