陳克勤賣舖賺百二萬

【明報專訊】噚日香港電台舉行新東論壇，社民連梁國雄質疑民建聯陳克勤炒樓，陳就表明自己無炒樓，過去十幾年只係得馬鞍山一個自住物業。點知論壇結束後，有一名喺九西參選嘅候選人好有心，竟然查晒陳克勤「買賣」舖位嘅資料畀傳媒。實情係，陳克勤喺2010年同朋友夾份投資地舖，持貨18個月後賣出，帳面賺咗360多萬，克勤一直只係得一個舖，咁算唔算炒舖，讀者可以自己判斷喇。


陳克勤透過持有嘅公司，買咗一間深水埗地舖，買入價1300萬元，當時佢有向立法會申報，傳媒亦有訪問過佢，因為克勤作為一個30出頭嘅後生仔，過去一直從政，但就已經有樓、有車、有舖，自然引人關注。


陳強調非「炒舖」係「投資」

陳克勤話，呢個舖喺8月15日完成買賣交易，佢以1663萬元賣出，扣除稅、手續費等後，佢個人大約淨賺120萬元，但佢強調當日向立法會做足申報，自己唔係炒舖，只係投資。


新界東其他候選名單仲包括田北俊、葉偉明、葛珮帆、方國珊、邱榮光、龐愛蘭、陳志全、蔡耀昌、張超雄、湯家驊、黃成智、劉慧卿、范國威、何民傑、龐一鳴、梁安琪、陳國強。